Umhverfis- og tæknisvið Uppsveita bs. hefur tengt málakerfi embættisins við stafrænt pósthólf á island.is

Pósthólfið opnast við innskráningu með Íslykli eða rafrænum skilríkjum inn á "Mínar síður" á www.island.is

Allir einstaklingar sem fá útgefna kennitölu og allir lögðilar sem skráðir eru í fyrirtækjaskrá hafa aðgang að sínu eigin stafræna pósthólfi.

Samkvæmt lögum 105/2021 er opinberum aðilum, þ.e. ríki, sveitarfélögum, stofnunum þeirra og öðrum opinberum aðilum, skylt að birta gögn i stafrænu pósthólfi stjórnvalda eigi síðar en 01.01.2025. Samkvæmt sömu lögum teljast gögn birt viðtakanda þegar gögnin eru aðgengileg í pósthólfi hans og á ábyrgð viðtakanda að fylgjast með hvort þeir eigi skjöl frá hinu opinbera í pósthólfi sínu.

Unnið er að innleiðingu pósthólfsins samkvæmt sérstakri innleiðingaráætlun og er UTU bs. fyrsta stofnunin á sveitarstjórnarstiginu til að tengjast þessu pósthólfi, en áður hafa sveitarfélögin Reykjavík og Akureyri sent launaseðla starfsmanna sinna inn í pósthólf þeirra.

UTU bs. hóf mánudaginn 16. maí 2022 að birta afgreiðslubréf byggingarfulltrúa og skipulagsnefndar í stafrænu pósthólfi umsækjenda. Einnig hafa reikningar vegna byggingarleyfisgjalda síðasta afgreiðslufundar verið send í pósthólf viðkomandi og grenndarkynningargögn til prufu.

Á næstu vikum mun embættið senda fleiri sértæk gögn og bréf, sem embættinu ber að birta skv. lögum, í pósthólf umsækjenda. Á meðan embættið vinnur að því að auglýsa þetta nýja fyrirkomulag verður birtingin í pósthólfinu til viðbótar við hefðbundna birtingu embættisins í tölvupósti og/eða útsend bréf send með landpósti.

Stefnt er að því að frá og með 1. september 2022 verði birting sértækra skjala, þ.e. skjala sem beint er sérstaklega til einstaklings eða lögaðila, eingöngu birt í pósthólfi viðkomandi.

UTU bs. vill hvetja alla Íslendinga til að kynna sér pósthólfið á island.is og ná sér í Ísland.is appið í símana sína. Einnig getur hver og einn stillt pósthólfið sitt þannig að hann fái hnipp í tölvupósti þegar nýtt skjal kemur inn á pósthólfið Það er til mikilla hægðarauka.

www.island.is - Öll opinber þjónusta á einum stað

Sjá nánar: Lög um stafrænt pósthólf í miðlægri þjónustugátt stjórnvalda nr. 105/2021